Мы падрыхтавалі спіс частых пытанняў (FAQ), каб дапамагчы вам разабрацца з працэсам падачы заяўкі і ўдзелу ў Communication Labs. Калі вас цікавяць умовы ўдзелу, аб’ём часу, які спатрэбіцца, або меры бяспекі, гэты раздзел прапануе дакладныя і практычныя адказы. Калі вы не знойдзеце патрэбнай інфармацыі, не саромейцеся звярнуцца да нашай каманды па адрасе: [email protected].
1) Некаторыя чальцы нашай каманды маюць абмежаванні на перамяшчэнне і не могуць прысутнічаць на першай сустрэчы ў Польшчы з-за незавершаных працэдур з дакументамі ў іншых краінах ЕЗ. Ці можам мы ўсё роўна падаць заяўку?
Так, вы ўсё роўна можаце падаваць заяўку. Мы разумеем такія складанасці і заахвочваем вашу каманду даслаць заяўку. Мы пастараемся знайсці альтэрнатыўныя варыянты ўдзелу, каб забяспечыць поўную ўключанасць кожнай каманды ў праграму.
2) Наша арганізацыя была вымушаная некалькі разоў змяняць месца працы з 2021 года, і мы рэгістравалі новыя арганізацыі ў розных краінах. Цяперашняя юрыдычная асоба была зарэгістраваная толькі некалькі месяцаў таму. Ці можам мы падаваць заяўку?
Так, вы можаце падаваць заяўку. Неабходна пацвердзіць, што ваша арганізацыя афіцыйна зарэгістраваная як юрыдычная асоба, а таксама прадэманстраваць, што вы і ваша каманда (у любым юрыдычным статусе) маеце мінімум 2 гады досведу працы над тэмай, якую вы плануеце асвятляць у сваёй камунікацыйнай кампаніі.
3) Ці пакрываюцца выдаткі на падарожжа на першую сустрэчу ў Польшчы для ўдзельнікаў і ўдзельніц, што прыязджаюць з іншых краін ЕЗ?
Так, выдаткі на падарожжа на сустрэчу ў Польшчы пакрываюцца за кошт фінансавання ЕЗ для ўдзельнікаў і ўдзельніц з іншых краін ЕЗ або Усходняга партнёрства (EaP). Гэта ўключае транспарт, пражыванне і харчаванне.
4) Ці могуць удзельнічаць у праграме тыя чальцы каманды, якія не з’яўляюцца грамадзянамі Беларусі?
Так, такія ўдзельнікі і ўдзельніцы могуць далучыцца да праграмы, напрыклад, у наступных выпадках:
- асоба з Беларусі, якая змяніла грамадзянства;
- асоба з ЕС або іншай краіны EaP, якая ўваходзіць у каманду беларускай АГС, што працуе па-за межамі Беларусі, і мае істотную ролю ў рэалізацыі кампаніі дзякуючы сваёй экспертызе, вопыту ці стратэгічнай ролі ў арганізацыі. Такія выпадкі будуць разглядацца індывідуальна і павінны быць апісаныя ў заяўцы.
5) Ці могуць падаваць заяўку індывідуальныя асобы, ці толькі арганізацыі?
Заяўкі могуць падаваць толькі арганізацыі. Аднак індывідуальныя асобы могуць быць чальцамі каманды, прадстаўляючы сваю арганізацыю або ініцыятыву. Толькі вядучы заяўнік/ца павінен прадстаўляць тую АГС, якая падала заяўку. Іншыя ўдзельнікі і ўдзельніцы каманды могуць прадстаўляць як гэтую ж арганізацыю, так і іншыя АГС, грамадскія рухі або ініцыятыўныя групы, што супрацоўнічаюць з АГС-заяўніцай.
6) Колькі гадзін на тыдзень удзельнікі і ўдзельніцы павінны прысвячаць праграме па развіцці патэнцыялу, уключаючы сесіі ментарства і распрацоўку кампаніі?
Удзельнікам і ўдзельніцам варта разлічваць прыкладна на 2–3 гадзіны на тыдзень для ментарскіх сесій і 3–4 гадзіны на тыдзень (у сярэднім) на работу ў камандзе па распрацоўцы кампаніі. Аднак аб’ём працы можа вар’іравацца ў залежнасці ад этапу праграмы, складанасці і маштабу канцэпцыі вашай кампаніі.
7) Што будзе, калі падчас удзелу ў праграме змяняцца нашыя абставіны, і мы не зможам яе завяршыць?
Мы разумеем, што могуць адбывацца непрадказальныя сітуацыі, асабліва для арганізацый у выгнанні. У такім выпадку рэкамендуем як мага хутчэй звязацца з камандай Праекта, каб абмеркаваць магчымыя варыянты або рашэнні.
8) Калі мы працуем, каб дасягнуць аўдыторыі ў Беларусі, ці абавязаныя мы выкарыстоўваць лагатып ЕЗ у публічных матэрыялах?
Мы ўсведамляем асаблівасці працы ў такіх умовах. Калі ваша кампанія скіравана на аўдыторыю ў Беларусі і публічная бачнасць можа стварыць пагрозу, вам не абавязкова выкарыстоўваць лагатып ЕЗ. Аднак гэтае пытанне неабходна абмеркаваць і ўзгадніць з камандай Праекта загадзя.
9) Ці можам мы выкарыстоўваць TikTok як асноўны камунікацыйны канал для нашай кампаніі, улічваючы яго ахоп і папулярнасць сярод нашай мэтавай аўдыторыі ў Беларусі?
Так, вы можаце выкарыстоўваць TikTok як камунікацыйны канал для вашай кампаніі. Выбар камунікацыйных каналаў павінен адпавядаць мэтам вашай кампаніі і быць заснаваны перадусім на асаблівасцях мэтавай аўдыторыі. Калі TikTok — гэта найбольш эфектыўны спосаб дасягнуць яе, вы можаце ўключыць яго ў сваю стратэгію.
Аднак бяспека павінна быць прыярытэтам – як для вашай каманды, так і для аўдыторыі. Мы рэкамендуем падыходзіць да гэтага з улікам рызык і дапоўніць TikTok іншымі платформамі, напрыклад, Instagram Reels, YouTube Shorts, Telegram і інш. Калі вас абяруць, вы зможаце дапрацаваць сваю стратэгію разам з ментарамі/камі і экспертамі/камі.
10) Якая справаздачнасць чакаецца ад удзельнікаў/ніц падчас ці пасля праграмы?
Падчас этапу ўзмацнення патэнцыялу ўдзельнікі і ўдзельніцы будуць мець рэгулярныя сустрэчы з камандай Праекта для маніторынгу прагрэсу, выяўлення праблем і аказання неабходнай падтрымкі. Па завяршэнні гэтага этапу трэба будзе падаць фінальную прапанову камунікацыйнай кампаніі. Фармальнай справаздачнасці на этапе навучання не патрабуецца.
Тыя ўдзельнікі/цы, што атрымаюць фінансаванне, павінны будуць падаць наратыўную і фінансавую справаздачы аб рэалізацыі кампаніі – адзін раз у сярэдзіне і адзін раз па завяршэнні кампаніі. У справаздачы павінна быць інфармацыя пра ход рэалізацыі, панесеныя выдаткі, а таксама пацвярджаючыя фінансавыя дакументы (рахункі, пацвярджэнні плацяжоў і інш.).
11) Як падтрымліваецца бяспека ўдзельнікаў/ніц падчас праграмы?
Бяспека і абарона ўдзельнікаў і ўдзельніц – наш прыярытэт. Мы выкарыстоўваем розныя меры для захавання канфідэнцыяльнасці і бяспекі, разумеючы асаблівыя выклікі, з якімі сутыкаюцца беларускія актывісты і актывісткі за мяжой. Уся інфармацыя пра ўдзельнікаў/ніц захоўваецца канфідэнцыяльна, і мы прытрымліваемся прынцыпу «не нашкодзіць». Асабістыя дадзеныя ніколі не перадаюцца без згоды, а ўсе адчувальныя размовы адбываюцца праз бяспечныя каналы. Усе ўзаемадзеянні і праграмныя мерапрыемствы адбываюцца на падставе даверу, эмпатыі і разумення складаных умоваў, у якіх працуюць беларускія АГС і актывісты/кі. Калі ў вас з’явяцца занепакоенасці з нагоды бяспекі, мы будзем гатовыя сумесна шукаць рашэнні.
